Cuentinos del Amagüestu 2011
L’Amagüestu d’esti añu, aparte servinos pa conocer meyor la nuestra cultura tradicional (xuegos, ellaboración de la sidra, magüestu castañes…) animónos a escribir unos cuentos pequeñinos onde castañes, mazanes, mayos y demás “personaxes” d’esta celebración tán siempre presentes. ¡Que vos presten!
Un trasgu mui revolvín
por Adán García Cuervo (cuartu cursu)
Yérase que se yera una vez nel tiempu la seronda, un trasgu mui revolvín tenía les oreyes mui grandes y picudes y taba mui delgáu de tar tol día blincando d´un llugar pa otru.
Un día espertólu un golpe mui grande, pegó un saltu, asomó’l focicu pa ver lo que pasaba, y alcontróse con un montón de neños y neñes gritando y saltando; veníen toos con cestes enllenes de castañes, panoyes y mazanes.
El trasgu nun lo podía creyer, taben enllenando l´horru onde vivía de coses perriques.
Fartucóse de too lo que pudo y cuando foi a dormir enriba la viga del horru oyó un estrueldu que lu tiró de la viga abaxo. Cuando se recuperó del golpe diose cuenta que taba rodiáu de xente, unos cantando, otros tocando la gaita, otros tocando´l panderu.
¡Ai mio madre! dixo´l trasgu, ¿ónde me guardo agora?
Corrió a metese nel corredor, pero taba enlleno d’oricios de castaña; d’un saltu baxó al solhorru, pero ellí taba perenllenu de xente esfoyando.
Paró un poco de blincar y púnxose a pensar, “¿qué pasaría si voi a xugar colos neños?”, que taben amagostando castañes y bebiendo sidra’l duernu.
L’únicu mieu que tenía’l trasgu yera que lu atoparen, asina que metióse debaxo d’un sombreru al llau del cestu de les castañes asaes, y ellí foi unu más del amagüestu ensin ser atopáu, y pasó una nueche de folixa que va costa-y olvidala.
Y colorín coloráu, el trasgu ta coláu.
La fiesta L’Amagüestu
por Llara Álvarez Martínez (cuartu cursu)
En tiempos de Maricastaña, había una fiesta a la qu’asistíen tolos neños y neñes del pueblu. La fiesta llamábase “L’Amagüestu” porque comíense castañes y bebíase sidrina.
Un día los neños dexaron de venir al Amagüestu, entós el mayu, la mazana, les castañes, la sidra, los zancos y toos los que participaben na fiesta ficieron una xunta.
El mayu dixo: “¿por qué nun vienen los neños?”. La mazana contésta-y: “porque seguramente tarán en so casa viendo la televisión o xugando col ordenador”.
Quedaron toos pensatibles buscando una solución.
Decidieron cortar los cables eléctricos porque ensin electricidá nun podíen ver la tele nin xugar col ordenador. Entós los neños foron al Amagüestu y toos pasáronlo xenial.
El neñu y el burru
por Sergio García Campo (cuartu cursu)
Yérase que se yera un neñu mui hábil que vivía en San Esteban, un pueblu del conceyu de Muros del Nalón. Al neñu gustába-y correr, correr y correr. Un día que diba pa un amagüestu, tropezó contra’l burru del vecín porque salióse pel prau. Nun sabia cuál yera, como nun tenía problema en dir foi llamar al vecín, que-y paecía que yera d’él. El neñu avisólu de que tenia’l burru fuera de la finca, el burru corría d’ellos y volvieron a intentalo pero nun salió nada bien.
Al final el burru cansó y por fin pudieron garralu y colorín coloráu esti cuentu yá ta fináu.
La mazana Rosina
por María García Cuervo (segundu cursu)
Ello yera una vez una pumarada perguapa. Nella había toa clas de mazanes: roxes, marielles, coloraes, grandes y pequeñes.
Pero’l suañu de toes elles yera ser mayaes polos neños del CRA pa la sidra l’amagüestu.
Rosina, la más gorda de toles mazanes, taba guardada tres d’unes cañes, pa que naide la comiere.
Por fin, un día vio llegar a unos neños y a unos profesores. Veníen con caxes pa pañar les mazanes pa la sidra. Rosina entamó a baillar, hasta que cayó dientro de la caxa d’unu d’ellos.
Y asina ye como Rosina, la mazana más bella de la pumarada, participó nel amagüestu del CRA y colorín colando esti cuentu ta acabando.
La castaña Maricastaña
por Alba López González (tercer cursu)
Yérase que se yera una castaña. Llamábenla Maricastaña. Yera mui pillina, pero nel colexu Llamábenla Taña y Maricastaña. Yera un poco fata, y por eso nun la tomaben en serio, asina que decidió marchar. Pero, ¿ónde alcontraría comida? Y pensó: “voi llevar una mochila”. Cuando Maricastaña llegó al bosque, y metióse nel centru, perdióse. Taba muerta mieu, porque yera’l día los difuntos. Púnxose a pensar qué diba facer y tevo una idea: ella alcordábase d’un llibru que lleó, que ponía que los difuntos salíen pel sur y dixo: “voi dir pel este, pero… y si hai llobos…”. Asina que Maricastaña pensó alcontrase con otra castañina llamada Nola y dixo-y:
-Hai un pueblín cercanu, pasaremos la nueche equí.
Taben nuna casina onde ta’l pueblín, taba pal norte. Al día siguiente díxo-y:
-¿Por qué t’escapasti, nun me tomabes en serio?, voi llevate al amagüestu onde toles castañes tán felices.
-¿En serio?
-Sí.
Llegaron al Amagüestu y Maricastaña taba dando blincos d’allegría y acabóse lo que se daba.
Florina y Xuanina
por Nuria Fernández López (tercer cursu)
En tiempos de Maricastaña yera una castañina llamada Xuanina y la so amiga yera una mazana llamada Florina. Un día Florina y Xuanina foron dar un paséu per La Caizuela y decidieron xugar al esconderite. Alcontráronse con un mayu y dixéron-y:
-¿Quies xugar con nosotres, mayu?
-Síííí –glayó’l mayu.
Florina díxo-y a Xuanina que tenía mieu, porque’l mayu machaca les mazanes pa facer sidrina duce. Pero esi mayu yera buenu, y como yera buenu, dixo Florina:
-Vamos.
Y dixo Xuanina:
-Y depués vamos dar un paséu y pañamos castañes.
El mayu, Florina y Xuanina tuvieron faciendo sidrina duce y unes 70.987 castañes. Y mayaron tanto y recoyeron tantos oricios, tantos que taben mui cansaos y el día siguiente durmieron tol día enteru y acabóse lo que se daba.
