Entamu ( Cursu 2006-2007)

Entama equí’l blog de Llingua Asturiana del institutu. Nél vamos espeyar lo que se fai -y delles veces lo que nun se pue facer- nel Centru al rodiu d’esta asignatura. Esti añu, vamos falavos de les dos actividaes programaes: la visita de los autores lliterarios -subvencionada pol Programa Perdayuri Asturias de la Conseyería d’Educaión- y les actividaes arreyaes a les Xornaes Culturales.

Ta planificao pa esti cursu que vengan al centru, dellos yá vinieron, cuatru autores lliterarios -Miguel Rojo, Vicente García Oliva, Alberto Álvarez Peña y Lourdes Álvarez- como pue vese toos de gran altor na so estaya lliteraria. L’oxetivu de les visites ye, como les que recibimos tolos años, acercar al alumnáu los autores qu’escriben los llibros qu’ellos lleen en clase.

Entamó Miguel Rojo con una interesante charra sobre l’últimu llibru de so: Cuentos pa un turista blancu, editorial Ámbitu. Entamó con una breve esposición sobre l’orixe de les histories que nos cuenta nesti prestosu llibru, fácil y amenu a la hora de lleelu, pa entrar darréu na primer historia que presenta. Les aventures del protagonista per África faciéndonos ver la otra cara de la realidá: lo estraño que nos pue parecer ver un negru perequí ye lo mesmo d’estraño que-yos paez a ellos ver un blancu ellí, qu’escuchamos con verdaderu interés. Pasó dempués a desvelanos los “trucos” del escritor pa enganchar al llector, que dende llueu consigue dafechu, y les casualidaes de la vida que fain que “misteriosamente” munches de les histories que nos cuenta nos sos relatos, llueu desarróllense na realidá, siendo l’escritor el primer desconcertáu por estes “casualidaes de la vida”. Perguapa visita y prestosa charra la de Miguel que, de xuru, dio llugar a que los ellí presentes quixeren lleer el llibru enteru. Gracies y esperamos vete otra vuelta per equí.

Recibimos, dempués, la visita de Vicente García Oliva que trayía en bolsu’l so últimu llibru pa rapazos A la bin bon ban, Academia de la Llingua Asturiana, Coleición Xuvenil. Un llibru que lleeron los alumnos de 1º y 2º de la ESO . Vicente, como nun podía ser d’otra manera, encandilónos a tolos presentes cola so prosa y les coses que nos contó. Gracies pola to visita y hasta pronto Vicente.


Otru de los autores que triximos esti añu foi Berto Álvarez Peña que vieno a falanos de maxa, bruxería y símbolos antiguos. Una charra prestosa que, baxo la prosa de Berto, resultó atractiva ya estimulante.

Desgraciadamente, la visita de Lourdes Álvarez nun foi posible por problemas de salú de la poeta que-y impideron venir a deleitanos cola so íntima y sentida poesía. Nun renunciamos a contar con ella pal añu que vien, si ye posible. Hasta pronto y bona recuperación.

LES XORNAES CULTURALES. MARZU 2007

Pente medies de les visites de los autores lliterarios, cellebramos nel Centru les Xornaes Culturales con talleres y actividaes de lo más variao y prestoso. Tolos años nos dos últimos díes de clase, enantes de les vacaciones del segundu trimestre, interrumpimos les clases a segunda hora pa cellebrales.

La xente d’asturianu, como siempre, entama’l taller “Asturies o trabayes”, frase que pa nós yá ye un emblema (col permisu de Dixebra) del trabayu que se fai al rodiu d’aspeutos que nun se trabayen con regularidá en clase.

Esti añu contamos cola presencia d’un mozu -pola edá non polos conocimientos y el bon facer- llamáu Héctor Braga. Entamador de grupos como Llangres, collaborador con figures como Toli Morilla, grupos como Dark la M, etc…, multiinstrumentista avezáu, mayestru de música tradicional en fin.

Héctor, nel primer día, presentónos la gaita tradicional asturiana, desplicándonos, de manera mui didáutica y amena, les partes, los materiales, los soníos, la historia… Dempués d’ello, pasó a tocar dellos de los sones tradicionales con ella. Darréu d’ello, presentónos un instrumentu que llamó muncho l’atención de los presentes: la zanfona o gaita de rabil. Curiosu instrumentu de tastu medieval. Dempués de presentala oficialmente, la so historia, los componentes, los emplegos que tenía antañu, enllazándola col facer de los xuglares, entamó a cantanos “coples de ciegu”, romances y otros cancios un poco más picardiosos. Cosa perguapa. Tamién presentó la bandurria tradicional, “tataragüela” de la bandurria moderna, como a él-y presta llamala. Con ella, cantónos xácares y otros cancios que nos prestaron abondo. Foi too, en fin, un deleite pa los oyíos de los allí presentes. Finó el repertoriu con una tonada o asturianada, acompangada de la gaita, que fizo subir el nivel d’emoción. Un éxitu total.

El segundu día fizo más de lo mesmo, deleitándonos con sones tradicionales: romances, xácares, tonada… y otros más modernos.